የፌዴራል ዋና ኦዲተር መ/ቤት ለመ/ቤቱ የማኔጅመንት አባላት በተቋማዊ አሠራር ላይ መካተት ስለሚገባው የስነ-ምግባር ትግበራ የግንዛቤ ማስጨበጫ ስልጠና ሰጠ፡፡
በስልጠናው መክፈቻ ላይ የተገኙት የፌዴራል ዋና ኦዲተር መ/ቤት ም/ዋና ኦዲተር ክቡር አቶ አበራ ታደሰ ባስተላለፉት መልዕክት የፌዴራል ዋና ኦዲተር መ/ቤት በተቋማት አሠራር ላይ ግልጸኝነትና ተጠያቂነት እንዲረጋገጥ የሚሠራ እንደመሆኑ በተለይም ከሙስናና ብልሹ አሠራሮች የጸዳ ተቋም በመፍጠር ለሌሎች አርዓያ ሆኖ መገኘት ይኖርበታል ብለዋል፡፡
አያይዘውም የመ/ቤቱ አመራሮችና ሰራተኞችም ተቋማዊ መልካም ስነ-ምግባርን ለማሳደግ በሚከናወኑ ተግባራትና የጥናትና ምርምር ሥራዎች እንዲሁም ብልሹ አሠራሮችን ለማስቀረት በሚደረጉ ጥረቶች ላይ በንቃት እንዲሳተፉ መልዕክት አስተላልፈዋል፡፡
በመ/ቤቱ የስነ-ምግባር ባለሙያ አቶ ግርማ አይችሉ ስለስነ-ምግባር ተግባራት ማካተት ምንነት፣ ዓለማ፣ ጥቅሞች፣ በማካተቱ ሂደት ከሥራ ኃላፊዎችና ሠራተኞች በሚጠበቁ ጉዳዮች ዙሪያ ገለጻ ያደረጉ ሲሆን በስልጠናው የተሳተፉ የማኔጅመንት አባላትም በተነሱ ሀሳቦች ላይ ተጨባጭ ልምዶችን በማንሳት ሰፊ ውይይት አድርገዋል፡፡
