News

17ኛው የአፍሪካ እንግሊዝኛ ተናጋሪ አገሮች ዋና ኦዲተሮች ማህበር የገቨርኒንግ ቦርድ ስብሰባ ተካሄደ

17ኛው የአፍሪካ እንግሊዝኛ ተናጋሪ አገሮች ዋና ኦዲተሮች ማህበር (AFROSAI-E) የገቨርኒንግ ቦርድ ስብሰባ ከሜይ 17-19-2021 ለሦስት ተከታታይ ቀናት ተካሒዷል፡፡

ስብሰባው በኮቪድ-19 ምክንያት በቨርቹዋል የስብሰባ መንገድ የተካሄደ ነው፡፡

የፌዴራል ዋና ኦዲተር መ/ቤትም በክብርት ወ/ሮ መሠረት ዳምጤ የኦዲት ዘርፍ ምክትል ዋና ኦዲተር አማካኝነት ተወክሎ የተሳተፈ ሲሆን ሌሎች የመ/ቤቱ የሥራ ኃላፊዎችም በስብሰባው ላይ ተሳትፈዋል፡፡

የስብሰባው ተሳታፊዎች ባለፈው ዓመት የተከናወኑ የስራ ውጤቶችን ገምግመዋል፡፡ በግምገማውም ከበርካታ የስራ ውጤቶች መካከል በኮቪድ-19 ምክንያት የገጽ ለገጽ የአቅም ግንባታ ስራ ማከናወን ባይቻልም፤ በቨርቹዋል የአሰለጣጠን መንገድ የተሰጡ ስልጠናዎች ውጤታማ የነበሩ መሆኑ ተጠቅሷል፡፡ በቀጣይም ሁኔታው እስከሚቀየር ድረስ ተጠናክሮ መቀጠል እንዳለበት የስብሰባው ተሳታፊዎች ተስማምተዋል፡፡

አባል አገራት ራሳቸውን በሚገመግሙበትና የጋራ ሪፖርት ተዘጋጅቶ ውይይት በሚደረግበት 2020 Institutional Capacity Building Framerwork (ICBF) Self-Assessment Report ላይም ውይይት ተደርጓል፡፡ ይህ ሪፖርት የማህበሩ አባል የሆኑ የኦዲት ተቋማትን በአምስት ዋና ዋና ዘርፎች ማለትም በተቋም ነፃነት እና የሕግ ማዕቀፍ፣ በተቋም  አመራርና አስተዳደር፣ በሰው ሀይል አስተዳደር፣ በኦዲት ስታንዳርድና ሜቴዶሎጂ እንዲሁም በተግባቦት ስራዎችና የባለድርሻ አካላት ግንኙነት የሚገመግም ሲሆን በሪፖርቱ መሰረት የ2020 ክንውን በኮቪድ 19 ምክንያት የአፈፃፀም መቀነስ ማሳየቱን አመልክቷል፡፡

በገቨርኒግ ቦርዱ ስብሰባ ላይ አዳዲስ የተሾሙ ዋና ኦዲተሮች እንኳን ደህና መጣችሁ የተባሉ ሲሆን ለተሰናባች ዋና ኦዲተሮችም ተሳታፊዎች መልካም ምኞታቸውን ገልጸውላቸዋል፡፡ ክብርት ወ/ሮ መሰረት ዳምጤም ለቦርድ አባላት ራሳቸውን በማስተዋወቅ ስለቀድሞው የፌዴራል ዋና ኦዲተር ክቡር አቶ ገመቹ ዱቢሶ አጭር ገለፃ አድርገዋል፡፡

በገለፃቸውም ክቡር አቶ ገመቹ ዱቢሶ በመቤቱ ማቋቋሚያ አዋጅ መሰረት ለሁለት ዙር (12 ዓመታት) አገልግለው በክብር መሰናበታቸውን ጠቅሰው በቆይታቸው በርካታ ውጤታማ ስራዎችን የፈፀሙ መሆኑን አስረድተዋል፡፡ በዚህም የተቋሙን ነፃነት ማስጠበቅ፣ የፋይናንሺያል ኦዲት ሽፋንን ወደ መቶ ፐርሰንት ማሳደግ እንዲሁም ተቋማዊ አቅም በማሳደግ ረገድ የኢንፎርሜሽን ቴክኖሎጂ አቅም ግንባታና አጠቃቀም ለማሳደግ የተሰራው ስራ ክቡር ዋና ኦዲተር ካበረከቷቸው ከብዙዎቹ ውጤቶች ጥቂቶቹ ናቸው ብለዋል፡፡

11ኛው የገቨርኒግ ቦርድ ስብሰባ በአገራችን አስተናጋጅነት እ.ኤ.አ 2014 (2006 ዓ.ም) ከሜይ 5-9/2014 በአዲስ አበባ በአፍሪካ ኢኮኖሚክ ኮሚሽን አዳራሽ የተከናወነ መሆኑ የሚታወስ ነው፡፡

የአፍሪካ እንግሊዝኛ ተናጋሪ አገሮች ዋና ኦዲተሮች ማህበር (AFROSAI-E) 26 አባል አገራት ያሉት ሲሆን በዋናነት በተቋማዊ የአቅም ግንባታ ድጋፎች ላይ አተኩሮ የሚሰራ ማህበር ነው፡፡

Leave a Reply

Your email address will not be published. Required fields are marked *