News

ለተቋሙ የፅህፈት ስራና ቢሮ አስተዳደር ባለሙያዎች ሥልጠና ተሰጠ

የፌዴራል ዋና ኦዲተር መ/ቤት በተቋሙ ለሚገኙ የፅህፈት ስራና ቢሮ አስተዳደር ባለሙያዎች የቢሮ አስተዳደር ሥልጠና ከመጋቢት 2-13፣ 2011 ዓ.ም ሰጠ፡፡

ሥልጠናውን ሲሰጡ ከነበሩት መምህራን መካከል አቶ ተመስገን ዳኜ የሥልጠናውን ዓለማ ሲገልፁ በዋናነት ሦስት መሠረታዊ ጉዳዮች መሠረት ያደረገ ሥልጠና መሰጠቱን ገልፀው በዚህም ሠራተኞቹ በሥራቸው ላይ ያላቸውን አመለካከት ለመለወጥ፣ ለሙያቸው ያላቸውን እውቀት ለመጨመርና ክህሎታቸውን ለማዳበር የሚረዳ እንደሆነ ተናግረዋል፡፡

ሥልጠናው የሥራ አመራር ፅንሰ ሀሳብ፣ የደንበኞች አገልግሎት፣ ተግባቦት፣ እራስን መምራትና የማህደር አስተዳደር የንድፈ ሀሳብ ትምህርቶችን እንዳካተተ የተግባር ትምህርቱ ደግሞ የኮምፒዩተር አፕሊኬሽን በሆኑት በማይክሮ ሶፍት ወርድ /Word/፣ ኤክሴል /Excel/ እና ፓወርፖይንት /PowerPoint/ ላይ እንዳተኮረ አቶ ተመስገን ገልፀዋል፡፡

በተቋሙ በፀሐፊነትና በተለያዩ የሥራ መደቦች ላይ ሲያገለግሉ የቆዩት ወ/ሮ መብራቴ ካሣ ስለሥልጠናው ሲገልፁ በሥራ አጋጣሚ ከሚያውቁት ነገር የተለዩ አዳዲስ እውቀትና ክህሎት እንደቀሰሙበት ገልፀው በተለይም ሥልጠናው የሥራ ተነሳሽነታቸውን እንደጨመረላቸው ተናግረዋል፡፡

ስልጠናውን የወሰዱት ሌላዋ የመ/ቤቱ የጽህፈትና ቢሮ አስተዳደር ሰራተኛ ወ/ሮ ሰላም ፅጉ በበኩላቸው ስልጠናው ጠቃሚ እንደነበረና ለሥራቸው የሚጠቅም በተግባር የተደገፉ በርካታ አዳዲስ እውቀቶችንና ቀላል የአሠራር ዘዴዎችን እንዳገኙበት ተናግረው ያገኙትንም እውቀት በተግባር ለመለወጥ መዘጋጀታቸውን ገልፀዋል፡፡

በሥልጠናው ማጠናቀቂያ የተገኙት የትምህርትና ሥልጠና ዳይሬክተር አቶ አወቀ ጤናው ባስተላለፉት መልዕክት ሰልጣኞች በቆይታቸው ለሥራቸው ውጤታማነት የሚረዳ ሥልጠና እንዳገኙ ያላቸው እምነት በመግለፅ የቀሰሙትን እውቀት ወደ ተግባር በመለወጥ የተቋሙን ራዕይ እውን እንዲሆን የበኩላቸውን አስተዋፅዖ ሊያበረክቱ እንደሚገባ አሳስበዋል፡፡

ሥልጠናው ለ10 ቀናት ከመጋቢት 2-13፣ 2011 ዓ.ም ድረስ በተቋሙ የማሰልጠኛ ማዕከል የተሰጠ ሲሆን በስልጠናው 20 ፀሐፊዎች ተሳትፈውበታል፡፡

Leave a Reply

Your email address will not be published. Required fields are marked *